Di sier Andrea Griti, provedador zeneral, date a Peschiera, a dì 10. Dil zonzer lì con il signor missier Zuan Jacomo Triulzi e le zente di la christianissima majestà. Le qual vanno unide, fanno [546] danni. Li fa proveder di vituarie etc.; anderano a passar a Ponte Ojo sul milanese.
     
      Di Milam, dil secretario, di 10. Come fo col gran maistro, e li disse la conclusion di la trieva. Rispose saria stà bon fusse stà etiam messi quelli fuora de Italia; tamen, poi che non è stà fatto, mi piace. Et che quelli signori francesi mostrò averne gran piacer; e che 'l gram maistro disse: Si 'l re si contenterà, la mi piacerà.
     
      Di Roverè, di sier Zuan Francesco Pixani, podestà, et sier Zuan Diedo, provedador. Come quelli di Roverè hanno, tra le altre ville, Folgaria soto de si, la qual si rese a' todeschi. Or par, quelli di Trento li habbi mandato a far comandamento vengino a raxon a Trento; sì che la Signoria comandi etc.
     
      Di Riva, di sier Zacaria Contarini, el cavalier, orator, di X. Narra la expedition di capitoli in publica forma et sigilati e sotoscripti, e parole usate per il prescidente nel suo partir. Et come quelli deputati, a Trento havia licentià le zente, et mandato a far le proclame in la Istria e per tutto. Item, esser venuto lì a Riva a trovarlo domino pre' Lucha di Renaldi, dicendo è bon servitor di la Signoria nostra; et era 4 zorni era lì ad Archo, e li deputati non havia voluto si mostrasse. El qual è stà bona causa di la conclusion, et ha ditto a li deputati: Concludè, si non, andarò in Alemagna e vi farò tajar la testa.