Andò le parte: 76 dil Trun, 100 dil Venier; et questa fu presa. Sì che Postomia sarà restituita. Et fono expedite le letere, et ita fuit postea restituta.
     
      [1508 06 13]A dì 13. Fo gran consejo. Fu dà principio a li capelli con do busi, come fu preso nel consejo di X; [548] et fo confusiom, ma ben spazà molto più presto. Et fo fato capitanio in Candia sier Christofal Moro, che vien luogotenente di Cypri.
     
      [1508 06 14]A dì 14. Gionse in questa terra sier Bernardim da cha' Tajapiera, quondam sier Zuane, sopracomito, roto in mar. E disse che 'l dubitava de la galia Capella, che è gran fato non si sappi 0 zà tanti zorni. La qual è richa di forssi ducati 30 milia, et su la qual è sier Lunardo Bembo, vien baylo di Constantinopoli, et Filippo Zamberti, nodaro di l'avogaria, vien da Napoli di Romania con processi etc.
     
      Da poi disnar fo consejo di X con zonta. E introno su la expedition di sier Texeo Bolani, el qual è stà spazà di colegio, non torturato per la età di anni 82; ma li è stà trovato sacheti con tajadure di Marcelli et altri indicij veri et chiari, ma non fo expedito. Fo letere di Roma. Di Franza, date ad Avignon, di l'orator, di primo. Di l'intrar lì dil cardinal Roan, legato, molto honorato e con gran pompa, come dirò. Item, fo letere di Goricia, di sier Zorzi Corner, el cavalier, provedador, qual era venuto lì col governador, inteso la conclusiom di le trieve etc.
     
      [1508 06 15]A dì 15, fo il zorno di San Vido. Fo fato le cerimonie solite. Fo il principe per terra, con li oratori.