Li rispose sier Hironimo Capello, savio a terra ferma; non fo aldito. Et cussì li savij non mandono la parte, perchè il consejo non la voleva prender.
     
      Noto. In questi zorni, a dì 12 da matina, in colegio aveno audientia li oratori di la Patria di Friul, numero 6, venuti a congratularse di la felice vitoria, dimandando alcune cosse; et feno una longa oration latina in colegio. Sono domino Antonio Sovergnan, dotor, domino ... di la Torre, domino Piero Dozimo di Porzia, el dagan de Udene ... et el vescovo di Franceschi, per nome dil patriarcha Grimani. Il principe li mostrò bona ciera, perchè si hanno ben portato; et fonno remessi a li savij di colegio a le petiziom.
     
      Item, a dì 11, el zorno di Pasqua di mazo, ai frati menori, sier Ypolito Contarini, di sier Ulivier, tene le conclusion publice; à studiato assa' a Padoa. Li fo arguito per sier Sabastian Foscarini, dotor, letor im philosophia, et altri frati. Si portò ben, et fo assa' patricij convidati a questo acto. Et vol andar a Bologna et a Roma a tenir le conclusion e ivi dotorarsi.
     
      Item, a Verona in questo zorno morite domino Hironimo de Monte, colateral zeneral nostro, stato assa' infermo de mal franzoso. Questo fo fiol di domino Marioto di Monte, fo etiam colateral zeneral nostro.
     
      Ancora si partì di qui la galia sotil, soracomito sier Alvise Contarini, quondam sier Piero, con hordine vadi a Trieste et ivi star.
     
      [1508 06 18]A dì 18. La matina, sier Zacaria Contarini, el cavalier, venuto di Riva, orator nostro, con la conclusion di le trieve con il re di romani, qual a dì 16 da sera gionse, fo a la Signoria et presentò li capitoli con 4 sigilli et sottoscripti da tutti, et la commissione lhoro autenticha.