Roan non era lì; et l'orator, visto era in colora, ancora che havesse letere di la liga, non li parse di dir altro.
     
      [1508 06 21]A dì 21. Da poi disnar fo pregadi, per i sinici [555] di terra ferma, sier Andrea Mocenigo, dotor, sier Vetor Capello et sier Lorenzo Orio, dotor, per expedir sier Polo Trivixam, el cavalier, di sier Baldissera, fo provedador a Sallò, intromesso per lhoro, preso di retenir per pregadi, et expedito di colegio. Et parlò sier Vetor Capello, et li fece 7 oppositiom, le qual haveano molti capi per una; et la prima, chiamata chamufatio, havia 7 capi, et questa sola compite. Fo licentiato il pregadi et rimesso a un altro zorno. Era ivi ditto sier Pollo e parenti.
     
      [1508 06 22]A dì 22, fo il zorno dil Corpo di Christo. Fu fato la precessione a San Marco, in zercha la piaza; ma non fu fato soleri, come si faceva, perchè cussì fu ordinato non far. Non vi pelegrini, perchè erano partiti con la galia dil Zaffo, patron sier Jacomo Michiel, et la nave di Marconi. Erano oratori, Franza, Spagna et Ferara; cavalieri 4, vestiti d'oro, solamente: sier Pollo Pixani, consier, sier Zorzi Pixani, sier Sabastian Zustignan et sier Piero Pasqualigo. Non vi era il patriarcha novo, 'per non esser zonte le bolle, tamen è spazate, erano a Roma al piombo. Disse messa el vescovo de ... Era etiam lo episcopo di Chisamo, domino Dominico di Alepo. In questa sera zonseno sier Zorzi Emo et sier Andrea Griti, ritornano provedadori zenerali di campo.
     
      [1508 06 23]A dì 23. La matina diti proveditori fonno in colegio, et il Griti, per esser più zovene, referì. Laudò la compagnia dil capetanio zeneral, ben in hordine; disse in li pericoli erano stati da' spagnoli; et si scusono non haver potuto operar l'intento a la Piera, la causa si sa.