.
     
      [557] ... Item, vene letere di Franza, di Liom, di l'orator, di 19. Dil zonzer lì dil cardinal Roam, qual à fulminato per la conclusion di le trieve.
     
      [1508 06 28]A dì 28. Fo consejo di X con zonta; non fu il doxe. Feno li soi capi, per lujo: sier Nicolò di Prioli, sier Marco Antonio Loredam et, nuovo, sier Alvixe Emo, fo capetanio a Brexa. In questo zorno, a horre ..., fo un grandissimo temporal in Veniexia, di pioza, vento et tempesta, durò zercha una horra etc. Item, nel consejo di X fenno alcuni di zonta, che manchava: sier Zorzi Corner, el cavalier, vien provedador di campo, et altri.
     
      [1508 06 29]A dì 29. Fo gran consejo. Et rimase sier Ferigo Contarini, quondam sier Hironimo, che si anegò noviter, provedador di l'armada, da tre di mazor titolo, provedador ad Axola; et lui è zovene, sì che fo premiato.
     
      [1508 06 30]A dì 30. Fo pregadi et fo il principe. Et leto queste letere:
     
      Di Roma, di l'orator, di 24. Di coloquij abuti col papa. Qual li ha ditto li piace di la trieva, ch'è per 3 anni, perchè in questo mezo si potrà tratar acordo contra infidelli. Et vol mandar uno suo, domino Raymondo, in Alemagna; et si maraveglia non aver letere dil suo legato, cardinal Santa †, di Elemagna; e desidera molto letere dil cardinal Chiaramonte, è andato in Franza. Item, coloquij abuti con l'orator fiorentino, domino ..., è lì a Roma. Qual li à dito aver da' soi excelsi signori, debi dirli che 'l re di Franza manda domino Michiel Rizo, orator suo, a Fiorenza, per far mutation di quel stato, et è cosa pericolosa in Italia, perhò la Signoria doveria meter mente.