Il re disse: È bon spazarla presto etc. Item, manda una letera abuta di Lisbona zercha le cosse di Coloqut e nove, molta longa, la copia sarà qui soto. Item, come havendo uno inquisitor in Corduba fato morir più di 250 per marani, e toltoli 200 milia ducati, si dice li hanno fato morir injustamente, e venuto a la corte, il re l'à fato retenir et vol saper la verità. Item, di uno chiarante, qual à nave, et porta uno doxe incadenado sul gajardo di la nave, et lo volta per mar, mostrando esser nimicho di venitiani. Et l'orator andò dal re et si lamentò di questui; il re disse provederia. Item, esso orator scrive, il re solicita la expedition di la liga.
     
      Di Goricia, di sier Zorzi Corner, el cavalier, provedador, di 24 et 28. Per l'ultima avia ricevuto la licentia et partiria. Item, aver fato consignar Postomia a li noncij regij, qualli veneno con cavali 150 et fanti ben in hordine; et questo fo l'adunation havia inteso, et scrisse, si faceva in Lubiana. Item, si va drio fabricando Goricia etc.
     
      Di sier Donà da Leze, provedador, date a Cremons. Come, poi la licentia, ave il comandamento dil Corner, provedador, dovesse restar a compir quelle fabriche, cussì restò; horra, auto licentia di la Signoria, subito veria etc.
     
      Di Trieste, di sier Francesco Capello, el cavalier, provedador. Zercha quelle occorentie. Et di crauzi, solevano venir lì con formenti, et erano retenuti parte, horra, venendo, non sa quello habbi a far.
     
      Di Fiume, di sier Hironimo Contarini, provedador di l'armada. Come à 'uto la licentia, et anderà versso Levante; et che a Segna si fa li contrabandi si voleva far versso Trieste e Fiume.