[1508 07 03]A dì 3. Da poi disnar fo pregadi. Et leto le infrascripte letere:
     
      Di Udene, di sier Zorzi Corner, el cavalier, provedador zeneral. Dil suo partir de Goricia per repatriar, et zonzer lì; et consegnerà Pordenon a li noncij dil signor Bortolo, justa i mandati etc., ut in litteris.
     
      Dil signor Bortolo d'Alviano, date a [568] Goricia, drizate a Zuan Cotta, suo secretario, e soi. Come domenega el sarà qui a la presentia di la Signoria nostra. Et nota, soa moglie era zà venuta, alozata in caxa di Raphael Gritti a San Martim. Et per la Signoria, col colegio, fo ordinato farli honor, et mandato a preparar la caxa dil ducha di Ferara.
     
      Di Faenza, di sier Alvixe Capello, provedador. Come, da poi il tajar di la testa a li 4 fu fato a Bologna, et esser lassà di prexom quel Alexandro di Pepoli, el legato, cardinal Pavia, continuava a farsi dar danari a li citadini. El si fabricava il palazo di Marascoti di li danari di queloro el feno ruinar, ch'era lhoro parte contraria.
     
      Di Roma, di sier Zuan Badoer, dotor, cavalier, orator nostro, di 28. Di l'intrar di do oratori di Chastiglia in Roma, molto honoratamente, venuti per dar ubedientia al papa. Li andò contra la fameglia dil papa et di cardinali et li oratori. Item, come è nova dil zonzer a Fiorenza di domino Michiel Rizo, neapolitano, orator di Franza, a protestarli non molestasseno pisani. Item, el cardinal Lisbona, vechio, stava malissimo; et che 'l vescovo di Bergamo, da cha' Cabriel, è lì in corte, stava malissimo.
     
      Di Candia, di sier Hironimo Donado, dotor, sier Piero Marcello, capetanio, sier Polo Querini, et sier Andrea Soranzo, consieri, di 30 mazo.