Fo chiamà 35 nobeli patricij, doctori et altri, tra i qual Jo Marin Sanudo, ad andar domenega a Margera, contra il signor Bortolo; poi altri 30, tra i qual cavalieri et altri di pregadi, e di più età, andar a San Piero di Castello, dove sarano li piati, et lo condurano a Santo Antonio, dove sarà il bucintoro. Et fo invidà il senato con il principe etc.
     
      Fu posto, per sier Antonio Trun, procurator, savio dil consejo, atento li zudei haveano compito li soi capitoli, et dovendo pagar quello pagano di tanse e decime, è bon confirmarli per altri anni ...; et sier Antonio Trun parlò, dicendo lui li havea perseguitati, fato portar bareta zalla, posto a pagar decime etc., tamen vol far raxon a tutti. Or li savij volseno rispeto a esaminar ditti capitoli, et rimesso a uno altro consejo.
     
      [574] Fu fato scurtinio di uno provedador a Goricia, per uno anno, con li ducati 40 al mexe neti. Rimase sier Piero Venier, è di pregadi, quondam sier Domenego. Il scurtinio sarà qui soto scrito.
     
      In questo zorno gionse qui sier Zorzi Corner, el cavalier, vien provedador zeneral di campo, con gran vitoria. A Margera andono assaissime barche et assa' numero di zentilhomeni, et tra i qual do procuratori, sier Tomà Mocenigo et sier Domenego Trivisan, cavalier. Et esso sier Zorzi vene con una cadena d'oro, acompagnato da alcuni condutieri etc. et sier Francesco Mocenigo, pagador. Et montato in barcha, con le trombe avanti, intrò in Venetia; e tutti cridava: Corner! Corner! Vitoria! Vitoria! Et poi, venuto zoso pregadi, tutti andono a caxa a visitarlo.