Di Zara, di sier Hironimo Contarini, provedador di l'armada. Come, inteso le nove di Cataro, va a quella volta, con sier Vicenzo dal Riva et altri, et farà ogni provisione etc., ut in litteris.
     
      Di Cao d'Istria, di sier Etor da cha' Tajapiera, podestà et capitanio. Come à relatione, quelli 300 cavali di hongari, sono in Lubiana, esser venuti a requisition dil conte Cristoforo Frangipanni; qual, inteso le trieve, se ne ritornano in suso.
     
      [581] Di uno, fide degno, fo leto certo aviso, che in Sicilia si arma, et in Spagna, alcuni corsari, ut in litteris, et la nave Chiaranta etc., per esser a' danni di la Signoria nostra, per caxon di le represaje, ut patet.
     
      Di Spagna, di sier Francesco Corner, orator, date a Burgos, a dì 16, l'ultime, di zugno. Coloquij col re; come li piace di le vitorie, e di la praticità di le trieve. Item, che è nova, in Ingaltera si consumerà le noze di la fia dil re, fo moglie dil primogenito, nel secondogenito. Item, manda do letere, una al re, l'altra al cardinal di Toledo. Li scrive el re, de more, pregando voglij ajutarlo contra il re di Fesse e li darà Uran etc., e tute quelle marine, ut in litteris, la copia sarà qui soto, et vol mandarli suo fiol obstaso; sì che quel re aquisterà quelle terre d'acordo, et arà la marina fin a Mazachibir.
     
      Di Roma, di l'orator, di X. Come el cardinal Lisbona era miorato et lo episcopo di Bergamo, veneto, li era soprazonto fluso. Il papa, licet, come el scrisse, l'orator andasse da soa santità, pregando non facesse promotione ad alcun, il papa li disse, lui era dominus episcopatorum, et lo havia dato a lo episcopo di Zervia de Coleonibus; et che se di niun era dificultà, di questo non, perchè vacava in corte.