Poi si partì e andò a dormir a Mestre. Va a Pordenon a tuor il possesso, poi a Goricia etc.
     
      Da poi disnar fo colegio di le aque. Et fenno 3 prescidenti: sier Hironimo Duodo, iterum refermado, et sier Tadio Contarini et sier Alvise Grimani et altri dil colegio, zoè sier Marco Antonio Loredan, sier Hironimo Contarini, sier Alvise Malipiero, sier Antonio Pixani, sier Thomà Lion, sier Michiel Salamon, sier Zuan Bragadim, sier Luca Trun, sier Zorzi Emo, sier Alvise Malipiero, quondam sier Stefano (?), procurator, et ...
     
      Item, ozi fu fato le noze di mia cugnada, relita sier Zuan Francesco Venier, fo fia di sier Constantin di Prioli, in sier Nicolò Valaresso, quondam sier Cabriel. Et fo fato honorifice in cha' di sier Nicolò Venier, so cugnado; cossa rara, perhò ne ho fato memoria.
     
      [1508 07 20]A dì 20. Da poi disnar fo consejo di X. Et fo letere di Cataro, dil retor, et etiam dil provedador di l'armada, di 9, in bocha di Cataro. Scrive il provedador, si partiva de lì; et era ussito, perchè si amalava molti di le zurme. Et anche quelli turchi lì a Castelnovo lavoravano lentamente, haveano mandato 3 navilij ragusei a tuor legnami etc. Item, havia lassato a Cataro ... galie, zoè ...
     
      In questo consejo di X fo expedito sier Texeo Bolani, homo di anni 83, per aver stronzà monede, che 'l stia anni do serado in la preson di l'Armamento, poi sia bandizà di Venecia e dil destreto, con taja lire 1000 a chi 'l prenderà, e poi debi compir la vita soa in ditta preson di l'Armamento, et il suo sia ubligato a questa taja.