Fo caso inopinato, come fu quel di la mojer di sier Lunardo Emo. Idio li doni requie.
     
      Item, morite un belissimo zovene di anni 19, nominato Agustim Corner, di sier Beneto, da la Piscopia, qual sempre andava drio suo padre. Morse in 8 zorni di febre; et fu sepulto con zoglia in testa di verdure, per esser verzene.
     
      [1508 08 07]A dì 7. La matina sier Zuan Zantani, venuto capetanio e provedador di Corfù, fo in colegio e referì con li cai di X molte cosse.
     
      Da poi disnar fo consejo di X con la zonta solita, per la materia si trata, et feno uno di zonta, in locho di quelli manchava et erano cazati, sier Alvixe Grimani, gobo. Et introe ordinario dil consejo di X sier Andrea Gritti, in loco di sier Nicolò di Prioli, era intrato governador di l'intrade; et di sier Francesco Foscari, el cavalier, è fuora, licet sia in questa terra, per aver vachado tre mercori, introe sier Alvise Malipiero; li qualli do zà erano stà electi, novi, dil consejo di X. Et fo divulgato esser stà examinà sier Zuan Alvise Cocho et sier Marin, suo fiol, et esser cazà dil consejo di X sier Marin Zustignan, l'avogador di comun. E nota, intisi, e cussì è cazadi, sier Piero Capelo, consier, sier Piero Querini, sier Marco Antonio Loredam, dil consejo di X, et sier Francesco Trun, consier. La causa, è per non se poter impazar in quelli da cha' Foscari.
     
      [606][1508 08 08]
      A dì 8. Fo etiam consejo di X con la zonta solita. E feno 3 di zonta, in luogo di sier Andrea Griti, è intrato ordinario, di sier Zorzi Corner, el cavalier, si caza con sier Alvise Malipiero, è intrato ordinario, et di uno altro, pur cazado, che manchava.