Fu posto, per i savij, certa confirmation di alcuni capitoli richiesti per quelli di Fiume, ut patet. E presi.
     
      Fu posto, per i savij, certe altre parte di lochi aquistadi di novo, come in quelle, per asetar le cosse.
     
      Fu posto, per i savij, certi capitoli di li oratori di Trieste, et resposto ut in eis, come in li libri di canzelaria apar.
     
      [1508 08 11]A dì XI. Da poi disnar fo consejo di X, con la zonta et il colegio e procuratori, e steteno fin hore 1/2 di note. Et come fo divulgato, expediteno sier Zuan Vendramin e alcuni altri; sier Sabastiano Loredan, par sia in veronese, non si pol haverlo e lo aspetano. E fo retenuto sier Bernardim Falier, quondam sier Zuane, padre di sier Andrea, qual era andato a Zara, et era stà mandà per lui.
     
      È da saper, tutta la terra era in moto per questa cossa de' marioli; et quelli haveano speso qualche ducato per esser stà nominadi, dubitavano assai. Quelli dil consejo di X e zonta erano molto secretissimi.
     
      [1508 08 12]A dì 12. Fo etiam consejo di X con la zonta solita, e steteno tardi, ut supra. Et expediteno e condanono parte dil resto è di examinadi e non retenuti, come se intese il zorno sequente, publichadi a gran consejo.
     
      In questi zorni, todeschi, ritornati in fontego nuovo a far le so merchadantie, qual perhò si va lavorando, feno assa' merchadi con nostri per la fiera, maxime di zenzari e altro; et le galie di Alexandria, carge e con grandissimo haver, si aspetava di dì in dì. Et li savij ai ordeni voleano meter do galie al viazo de Alexandria, con la muda solita; altri era di opinion non darli questa muda, ma ben meterle 3, a partir poi batizà la †, e muda X april; et questo per beneficio di la merchadantia.