Primo, sier Zuam Vendramin, quondam sier Alvise, electo podestà e capetanio a Feltre, per aver dato danari a quelli l'hano tolto e fato tuor a la dita podestaria e altrove, che 'l dito sier Zuane sia privo di la podesteria predita, e bandizà di Veniexia e dil destreto per anni 2 proximi; e, compiti, poi per anni 5 di tutti officij, beneficij, rezimenti e consegij, sì dentro come di fuora; e rompando questi do anni, stia mexi 6 im prexom, e comenzi il bando, et hoc tociens quociens, con taja ducati 200 di so beni; e sia tajà do instrumenti l'à fato, di aver dato caxe in vita a quelli l'hano tolto, e il fito di le dite caxe vadi a l'hospedal nostro di la Piatae: e di le predite cosse non se li possi far gratia, don, remission, recompensation, soto le più strete parte dil consejo di X, e si ben la fosse messa, non se intenda presa, si la non haverà tutte le balote dil consejo di X e di la zonta, al numero sono al presente stati a tal soa condanation.
     
      Item, sier Zuan Batista Lion, quondam sier Nicolò, per cambiar voxe e aver fato tuor dito sier [610] Zuan Vendramin, podestà e capetanio a Cividal di Belun, e aver auto da lui una caxa in vita e danari, come l'à confessà, che 'l dito sia privà di tutti officij, beneficij, rezimenti e consegij, ut supra, per anni 8, e sia tajà l'instrumento l'ha di la dita caxa etc.
     
      Item, sier Marin Querini, quondam sier Andrea, di Candia, per aver tolto dito sier Zuan Vendramin, podestà e capetanio a Feltre, dal qual à 'uto danari et ha confessà, che 'l dito sia privà de officij, beneficij, rezimenti e consegij, ut supra, per anni 8.