Altri dice voleno proceder più oltra, et chastigar alcuni grandi, si dice do, sier Francesco Foscari, el cavalier, va podestà a Padoa, et sier Domenego Contarini, va capetanio a Verona; piezi di qual è stati, dil primo, sier Piero Ferro, quondam sier Francesco, dil 2.°, sier Hironimo Michiel, di sier Nicolò.
     
      [1508 08 17]A dì 17. Colegio dito si reduse in camera. E da poi disnar fo consejo di X, con la zonta solita. E in questa matina, sier Andrea Bondimier, venuto capetanio di le galie di Alexandria, non ben sano, vestito di veludo negro, fo a la Signoria, et referì dil suo viazo.
     
      Et fo lasato di prexon sier Bernardim Falier, quondam sier Zuane, et fo expedito sier Matio Zancharuol, come dirò di soto. Item, sier Nicolò Michiel, procurator, fo cazà di la zonta, nescio propter quid.
     
      [1508 08 18]A dì 18. La matina, volendo sier Domenego Contarini, va capetanio a Verona, tuor il suo boletim a li cai di X, parse a li cai di X di non fargelo. Non se intende la causa; ma la terra dice per aver dato danari al suo piezo, lo tolse capetanio a Verona, che fo sier Hironimo Michiel, di sier Nicolò.
     
      Da poi disnar fo pregadi Et leto molte letere, videlicet:
     
      Di sier Hironimo Contarini, provedador di l'armada, date in bocha di Cataro, a dì 28 et ultimo lujo. Come era ritornato lì, per veder quello fevano turchi a lavorar a Castelnovo. Avisa vanno drio lavorando, ma non innovano alcuna cossa; et perhò si vol levar. Lassa sier Almorò Pixani, vice capetanio al colfo, et una altra galia et do brigantini.