Dil provedador di l'armada, date a dì 4, a la bocha di Cataro, di l'instante. Come si parte per Corphù, e lassa sier Almorò Pixani, vice capetanio dil colfo, et una galia et do brigantini lì.
     
      Di sier Almorò Pixani, vice capetanio dil colfo. Come a Castelnovo vanno lavorando, ma non innovano etc. Et scrive il bisogno di la sua galia, et de occurrentiis etc.
     
      Et leto le dite letere, restò consejo di X suso, con la zonta, colegio et li procuratori.
     
      [1508 08 20]A dì 20, domenega. Fo gran consejo. Et fo leto, per Zuan Jacomo, secretario dil consejo di X, una condanason, fata a dì 17 di l'instante, ne l'illustrissimo consejo di X con la zonta, contra sier Matio Zancaruol, di sier Bernardo, da Retimo, el qual fo piezo di sier Zuan Vendramim, podestà e capetanio a Cividal di Belun, dal qual ave danari, e con suo fradelo una caxa a vita, come l'à confessà, che 'l dito sia privo di tutti oficij, beneficij, rezimenti e consegij, sì dentro come di fuora, per anni 8; e non vaja l'instrumento di la caxa, qual sia tajà, come alias fu preso; e non se li possi far gratia, don, [617] remission, recompensation, soto le più strete parte dil consejo di X; e si ben fusse messa, non se intenda presa, si la non averà auto tute balote dil consejo di X con la zonta presente.
     
      Et poi leto dita condanason, fo mandà tutti fuora, et dito Zuan Jacomo andò a mezo il consejo, et lexe, come a dì 19 di l'instante, ne l'illustrissimo consejo di X con la zonta, era stà preso questa parte: conzosia che a dì 4 di l'instante, a la porta de l'illustrissimo consejo di X, sia stà trovà una letera senza sotoscrition, la qual dinota aver a dir molte cosse concernente il ben dil stado nostro, perhò per il prefato consejo di X, con la zonta, si fa certo, che chi, in termene di zorni 3, vegnirà ai cai dil consejo di X a manifestar tal cossa, sì che per la sua acusa si habi la verità, averà da la camera dil consejo di X, in contadi, ducati 4000, senza alcuna contradition, et sia tenuto di credenza et veramente; et se in dito termine non vegnirà, sia bandizà di Veniexia e dil distreto im perpetuo, e tutto il suo sia messo ne la camera dil consejo di X, el qual sia dato a chi quello acuserà, qual sarà tenuto di secreto.