Capi di X sier Bernardo Barbarigo, sier Marin Zorzi, dotor, et sier Hironimo Contarini, da Londra. Item, fo leto una parte, 1432, di zener, presa nel consejo di X, contra quelli fano sete et intelligentia nel mazor consejo, che sia bandizà di Veniexia e dil destreto im perpetuo e de tutte terre e luogi nostri etc., ut in parte.
     
      Et nota, non si farà altro. Et sier Domenego Contarini, va capetanio a Verona, qual è più zorni à mandato via il suo burchio, e li cai di X non li voleva dar il boletin, per aver dado ducati 30 a sier Hironimo Michiel, di sier Nicolò, fo suo piezo, etiam a sier Francesco Foscari, el cavalier, va podestà di Padoa, fo suo piezo sier Piero Ferro, quondam sier Francesco etc., ebeno horra li soi boletini etc.
     
      [1508 08 28]A dì 28, fo Santo Agustim. Da poi disnar fo pregadi. Et leto le infrascripte letere, questo è il sumario:
     
      Di Ferara, di sier Francesco Orio, vicedomino; di Faenza, di sier Piero Lando, provedador; di Ravena, di sier Alvise Marzello, podestà, et sier Pangrati Zustignan, capetanio, diverse letere di questa substantia. Come, per le cosse di Bologna, è stà scoperto uno tratato, che voleano alcuni citadini bolognesi far intrar, a dì 19, missier Anibal Bentivoi, qual, con 500 cavali lizieri, era propinquo. Et per questo, cavalchò il duca di Ferara, il cardinal di Mantoa et il signor Lodovico di la Mirandola in favor dil papa; et zà Zuan di Saxadello con zente era intrato in Bologna. Et a dì 16 alcuni cavalli di la Mirandola versso il Bonden si scontrono in Manzin da Bologna, fo nostro contestabele, qual era da la parte di missier Zuan Bentivoy, et fono a le man, et, preso, fo amazato.