Or pocho manchò missier Hannibal Bentivoy non havesse danno e non fusse preso; ma fuzite e si salvò. Et in Bologna fo scoperti li partesani, tra li qual Alexandro di Pepoli, Fantuzi et altri, qualli fuziteno di Bologna. Et missier Hanibal dovea intrar per la porta ditta in le letere; et se intese, per confession di uno citadino bolognese, ut in litteris, preso su quel di Ferara, che fuziva. Item, che 'l cardinal legato in Bologna si fortifichava et dubitava etc. A Carpi il ducha di Ferara andoe, e lo tolse tutto in suo dominio.
     
      Di Roma, l'ultime di 22. Di queste cosse di Bologna. E il papa à piacer, la Signoria non se impazi; et manda uno breve al nostro patriarcha, che in li monasterij e chiesie non possi più esser seguro homicidiarij, incendiarij, rebelli di la Chiesia etc., ut in eo, da esser intimato a li monasterij qui in [621] Veniexia e in dominio, per remover la scusa di la Signoria, che questi Bentivoi erano scosi in monasterij, e non li devemo recapito; et altre cosse, avisi ut in litteris.
     
      Di Milam, di Nicolò Stella, secretario, 3 letere. Come il ducha de Urbim era stato lì e stato con quelli signori; e questo, perchè, venendo a Mantoa, da la moglie, fia dil marchese, quel signor lo pregò indusiase, perchè non lo podeva honorar, perchè la marchesana era da parto. E cussì lui vene a Milan; fo honorato etc. Item, il gran maistro è varito e va in Franza. Item, aspeta il Caroldo, secretario, vien suo successor.
     
      Di Spagna, di sier Francesco Corner, orator, più letere, l'ultime di 8 avosto, date ... Avisa, come a dì 24 lujo Piero Navaro, capetanio di l'armada regia contra mori, havia preso uno scojo, al porto ditto Bolis, et sperava aver quel loco etc.