Item, di le trieve, à parlato col re, qual è amico di la Signoria nostra e li piace; et à ordinato il salvo conduto, per caxon di le represaje, a le galie nostre di Barbaria. Item, il re è venuto lì, partito di Burgos. À menato il secondogenito di la fiola; e à mandato per la fiola, qual non à voluto venir. Poi il re si partiva per Cordova, per castigar quel marchese, che è stà disobediente a certi mandati di soa alteza, ut in litteris.
     
      Di Napoli, di Lunardo Anselmi, consolo. Zanze, 0 da conto.
     
      Fo posto, per li savij d'acordo, scriver a Roma, zercha la bona mente nostra versso il papa, e non se impazar contra la soa santità, ni favorir Bentivoy, et similia. Presa.
     
      Fu posto, per li savij tutti, scriver al provedador di l'armada, che mandi a disarmar la galia di sier Almorò Pixani, vice capetanio al colfo, per esser assa' mexi è fuora, etiam le galie do bastarde. Presa.
     
      Fu posto, per li savij, far do contestabili per colegio e mandarli, uno con 100, l'altro con 50 fanti, a custodia di Cataro. Fu presa; a page 8 a l'anno.
     
      Fu posto, per li savij, certo ordine di mandar fanti a Otranto, e dar ducati 450 in uno gropo a sier Andrea Contarini, va governador a Otranto, per dar paga a li fanti sono lì, et meni di qui, et limitado certo numero, et 16 stagi in castello, con altre clausule, ut in parte. Presa.
     
      Fu posto una taja di Vicenza et uno salvoconduto a uno è debito, e altre partesele; et fo licentiato il pregadi.
     
      Et restò consejo di X con la solita zonta. Et [622] credo, che asolvesse sier Sabastian Loredan, quondam sier Fantin, perchè il zorno sequente fo visto a consejo, che prima non pareva a le mostre.