[1508 08 29]A dì 29, fo San Zuan Digolado. Fo gran consejo. Et fo leto una parte, presa nel consejo di X 1484, zercha quelli sta im pie' in cao di banchi, siam banditi di consejo, ut in parte etc.
     
      Da poi consejo si reduse la Signoria, con li cai di X. Et sier Zacaria Contarini, el cavalier, el qual si doveva partir la matina sequente, per andar capetanio a Cremona, ave certe letere di le cosse di Germania, et vene a conferir con la Signoria e li cai di X.
     
      Noto. In questi zorni a Citadela era ordinato, che do combateseno, videlicet uno nominato Gregeto ... et uno nominato Vestidelo ... Et doveva esser il duca di Urbin, il cardinal di Ferara e di Mantoa. Or a dì ... di questo si reduseno assa' persone ivi, et lhoro do fenno paxe, et dise l'uno non aver dito cussì; et 0 fuit.
     
      Item, in questo mexe versso Castello, in Quintavalle, era sì cativo aere, che ne era amalati più di 150 in Quintavalle, et dil ponte fino a San Domenego più di altratanti, et assa' puti morti; adeo il reverendissimo domino patriarcha novo si partì de lì, et ritornò a star a Santa Maria di l'Orto, dubitando di l'aere cativo etc.
     
      [1508 08 30]A dì 30. Fo pregadi. Et leto letere di Franza, di 20. Bone parole dil re zercha la trieva etc.; coloquij, ut in litteris.
     
      Di Milam, di Zuan Jacomo Caroldo, secretario nostro, zonto lì in loco di Nicolò Stela, qual vien a repatriar. Scrive esser stato dal gram maistro, coloquij insieme etc.
     
      Di Spagna, di sier Francesco Corner, orator nostro, di 6 avosto. Dil partir dil re di Burgos.