Fu posto, per alcuni savij, dar a domino Hironimo Sovergnan, si à ben portato in questa guerra, per anni 8, il castel di Belgrado in la Patria, noviter aquistato, qual ha de intrada ducati ... a l'anno, pagando ducati 50 a l'anno a la camera di Udene; et questo in recompenso di quanto à speso dil suo in questa guerra etc. Sier Piero Capello, el consier, messe elezer uno zentilomo per gran consejo, con ducati 20 al mexe; sier Piero Arimondo, cao di 40, messe elezerlo per eletion im pregadi. Et vedendo cussì, li savij non mandono la parte.
     
      Fu posto, per li savij, elezer successor di sier Antonio Condolmer, qual è stato assai orator in Franza, e si debbi partir quando vorà el consejo di pregadi. Sier Zorzi Pixani, dotor, cavalier, savio a terra ferma, va orator a Roma, contradise, dicendo [628] non era tempo di levarlo in queste occorentie, per la praticha l'ha, e messe di resalvarli l'oficio di savio di terra ferma, qual compiva questo mexe, a intrar 3 zorni da poi sarà ritornato in questa terra, e se indusij a far successor suo. Li savij si tolseno zoso, e lui mandò la so parte. Et presa.
     
      Altre partesele fu poste, non da conto.
     
      Item, la matina fo in colegio sier Zacaria Loredan, venuto provedador di Cadore, et referì zercha quel loco; e portò un desegno, e portò indrio certi danari li era avanzato etc.
     
      Item, sier Marco Tiepolo e sier Beneto fo in colegio, a dir come il nome di Pollo e Andrea Tiepolo havia falito per ducati 23 milia, e tamen soi fioli e nepoti voleano pagar tutti, aver certa comodità di 3 anni, a pagar ogni anno il 3.°, e tutti havia sotoscrito a' patti, eccepto Bexalù; et che si metesse parte im pregadi, che l'acordo sia fermo.