El qual Sophì è potente et à grandissima ubedientia; adeo li homeni nel suo campo si fa amazar per amor di Sophì, dicendo: Tajame la testa per Sophì! E moreno contenti. Et che 'l turco non voria questi do signori venisseno a la zornata, perchè quello fusse vincitor, li saria poi bastante contra lui; et altre particularità, ut in litteris. La copia di le qual forssi sarano scripte qui di soto.
     
      Di Franza, dil Condolmer, orator, più letere, date a Bles. Avisa di la morte di monsignor de Libret, fradelo dil gran maistro, monsignor di Chiamon, e nepote di Roan. Item, coloquij abuti col re et Roan zercha le trieve. Il re è contento intrarvi e sotoscriverà; e tamen darà ajuto al ducha di Geler, e vederà si 'l porà tuorli qualche terra in Fiandra, come à fato la Signoria di qua, acciò poy il re di romani vengi a qualche bon acordo.
     
      Di Milam, dil secretario. Come a dì 3 partì monsignor di Chiamon per Franza, acompagnato da molti primarij da Milan assa' fuora, versso Aste etc.; e il secretario nostro fino a Tesin. Lassò governador [632] a Milan monsignor di la Peliza, fo orator a la Signoria nostra, con domino Michiel Rizo; et etiam rimase monsignor et prescidente.
     
      Item, come pasò de lì domino Michiel Rizo, ritorna orator di Fiorenza, va in Franza. Dice Pisa in gran pericolo per la penuria di vituarie, fiorentini tien a la bocha di Arno certi navilij picoli, e hanno le zente d'arme a presso Pisa. Et missier Zuan Jacomo Triulzi ha hordine dil re andar con 300 homeni d'arme, aviati zà alcuni im parmesana, ma aspeta novo ordine dal re.