Fo fato scurtinio di tre savij a terra ferma, ordinarij, in loco di sier Hironimo Capello, sier Tadio Contarini et sier Zorzi Pixani, dotor, cavalier, che compieno. Et rimaseno sier Hironimo Querini et sier Marin Zorzi, doctor, con titolo, et sier Alvise Pixani, dal banco, è di pregadi, quondam sier Zuane, dal banco, di 6 balote da sier Alvixe Emo, cao dil consejo di X, quondam sier Michiel. Fono tolti sier Lucha Trun, cao dil consejo di X, sier Marco Zorzi, fo savio a terra ferma, sier Bernardo Barbarigo, fo savio a terra ferma, quondam serenissimo, sier Francesco Foscari, fo savio a terra ferma, quondam sier Filippo, procurator, et altri; sì che sier Alvixe Pixani ha anni zercha 40.
     
      Item, fo fato eletion di uno savio ai ordeni, in luogo di sier Vetor Capello, havia refudado: e [643] rimase sier Baptista Boldù, fo avochato grando, quondam sier Antonio, el cavalier.
     
      [1508 09 26]A dì 26. Da matina in colegio fu facto scurtinio de uno sora il cotimo di Damasco; et rimase sier Tomà Mozenigo, fo auditor nuovo, di sier Lunardo, quondam serenissimo, di una balota di sier Bortolo Contarini, è di pregadi, quondam sier Pollo, qual era stato consolo a Damasco. Et questo fo fato in luogo di sier Piero Zen, è andado consolo a Damasco.
     
      Da poi disnar fo consejo di X. Et electi do extraordinarij in canzelaria, che manchavano, videlicet uno Businelo et uno fio di domino Ulixes, dotor, avochato a Castello.
     
      Vene sier Zuam Batista Bonzi, stato podestà et capetanio di Ruigo, amallato; in loco dil qual andoe sier Antonio Bragadim, quondam sier Alvise, procurator.