Fo fato scurtinio per far un savio dil consejo, in luogo de sier Piero Duodo, è intrado consier da basso, e tolti numero ..., tra i qual sier Marco Antonio Morexini, cavalier, procurator, sier Zorzi Emo, fo provedador zeneral in campo, quondam sier Zuan, cavalier. Questi veneno a tante. Et non passò il Morexini, non voleva esser. Perhò fo tolti, con titolo, sier Nicolò Michiel, dotor, cavalier, procurator, sier Lunardo Grimani, sier Hironimo Donado, dotor.
     
      [1508 10 07]A dì 7. Fo consejo di X con la zonta e il colegio.
     
      [1508 10 08]A dì 8, domenega, fo San Marco. Ni 0 da conto.
     
      In questa note morì sier Zuan Batista Bonzi, fo podestà et capetanio di Ruigo, venuto de lì amalato, et solo di caxada, sì che l'à compì in questui. Fece uno testamento longo et assa' bizaro. Lassò facultà ducati 15 milia et più; lassò uno legato ai presonieri, vin puro, et sia pagato uno predicador li predichi e altre cose. Ditto testamento a dì ... dito in colegio fo lecto; e fo cosa ridiculosa, et per alcuni zorni di lui tutta la terra ne parlava. E lassò uno suo sezendelo, bello, d'arzento, a la chiesia di San Marco etc.
     
      [1508 10 09]A dì 9. Fo colegio di la Signoria e savij fin tardi, credo sora le zente d'arme, atento il signor conte di Pitiano, capitanio zeneral nostro, compie la sua ferma, e vien l'anno di rispeto, ch'è in libertà di la Signoria nostra; perhò consultono quid fiendum.
     
      [1508 10 10]A dì 10. Fo, da poi disnar, audientia di la Signoria et savij.
     
      [1508 10 11]A dì 11. Fo consejo di X.
     
      [1508 10 12]