Di Constantinopoli, di 12 et 13, dil baylo. Come havia conzo con li bassà, di li presoni, in ducati 8000; et perchè erano lì ducati 5500, troveria li altri a cambio; et a dì 19 saria Porta e li conteria a li bassà e sarano liberati. Qualli sono: sier Marco Orio, quondam sier Piero, sier Baptista Polani, di Candia, sier Vicenzo Pasqualigo, quondam sier Cosma, sier Vicenzo Zantani, di sier Zuane, et sier Pollo Zustignam, quondam sier Piero, quondam sier Dionisio, sier Bernardo e sier Piero Zustignan, di sier Francesco, e altri.
     
      Da Roma, di l'orator. Come, havendo ricevuto nostre letere, era andato per trovar il cardinal Senigaja, per dirli la Signoria li dava el possesso dil vescoa' di Trani. Et era ocupato, perchè diceva messa a le exequie si feva dil cardinal San Piero in Vincula; e, spojato, li disse. Qual ringratiò molto la Signoria nostra, offerendossi etc.; et esso cardinal scrisse a la Signoria una optima letera. Item, essere ritornà di Franza quel domino Maximo, andò per stafeta. Et il cardinal Chiaramonte, zoè Aus, tornava di Franza, et doveva zonzer a Cità Vechia; vien per mar. E li era stà mandà contra, il papa desiderava parlarli etc. Item, Guido Guaim, era nostro provisionato e soldato in tempo di questa guerra di [650] todeschi, et è cugnato dil cardinal Pavia, è legato a Bologna, era zonto a Roma, et il papa lo havia fato capetanio di so balestrieri et datoli cavali 25. Questo si partì con licentia di la Signoria. Item, dil zonzer lì Marco Antonio Colona. Item, di Toscana è nova, che alcune done pisane, per numero 150 in cercha, tornando di Lucha, di certa fiera, erano state per fiorentini prese et poste in fondi di torre etc. a pan et aqua.