Fu posto, per sier Polo Pixani, el cavalier, consier, sier Antonio Loredan, cavalier, savio dil consejo, sier Marin Zorzi, dotor, savio a terra ferma, atento vacha la lectura di l'ordinaria di philosophia a Padoa, per il partir di l'Aquilin, bolognese, concorente di ..., che 'l sia posto a ditta letura domino maistro Marco Antonio da la Torre, fo fiol dil quondam missier maistro Hironimo da Verona, qual à leto e leze im philosophia. Sier Alvise Pixani, savio a terra ferma, messe di condur missier Marco di Otranto, che etiam leze im philosophia extraordinarie. Parlò primo sier Zorzi Emo, savio dil consejo, dicendo saria bon trovar qualche excelente homo, come e il Sessa, ch'è a Napoli, o ver il Toseto, ch'è ... Li rispose sier Polo Pixani, el cavalier; poi parlò sier Alvise Pixani, el qual perhò si tolse zoso, e intrò, col resto di savij, [654] de indusiar. Demum parlò sier Marin Zorzi, dotor. Andò le parte; e fu preso la indugia, di 8 ballote.
     
      Fu posto, per li savij ai ordeni, sier Tomà Donado, sier Andrea da Molin, sier Piero Diedo, et sier Piero Antonio Morexini, 2 galie al trafego, con l'incanto, ut in parte. Sier Batista Boldù, savio ai ordeni, contradixe, dicendo vol meter 3 galie in Alexandria, e non meter queste al trafego, e disse la so opinion con le raxon sue. Li rispose sier Andrea da Molin; poi parlò sier Alvise di Prioli, savio a terra ferma, qual non vol ni una ni l'altra opinion et 0 messe. Ultimo parlò sier Tomà Donado. Andò la parte: di largo fo presa quella di 4 savij ai ordenj, zoè l'incanto.