Et vene letere dil secretario nostro è in Hongaria, il sumario scriverò poi.
     
      [663][1508 11 11]
      A dì 11, fo San Martim. Et fo gran consejo. Et fo letere dil baylo di Constantinopoli, di 23 setembrio. Di la liberation di presoni, a dì 19, ussiti di castello di Mar Mazor, numero XI, ut patet, et scriverò di soto.
     
      [1508 11 12]A dì 12, domenega. Fo etiam gram consejo.
     
      [1508 11 13]A dì 13. Da poi disnar fo pregadi. Et leto le infrascripte letere:
     
      Di Cypro, di sier Lorenzo Zustignan, luogotenente, et sier Piero Baxadona, consier. Zercha formenti mandano di qui et orzi etc. Item, hanno avisi dil charaman, che Sophì era andato contra Alidulli, e dato una rota grandissima ai fioli dil ditto Alidulli. E à inteso, il turcho li ajutava; perhò, compita questa impresa di Alidulli, Sophì vol venir contra il turcho, et maxime seguendo la morte dil turcho, che non pol star molto.
     
      Di Constantinopoli, dil baylo, di 24 septembrio. Come a dì 19 sier Marco Orio e compagni, presoni, numero 12, erano stà liberati, et vieneno per terra in questa terra. Et esso baylo à contato a li bassà ducati 8000 venitiani; et che 'l signor, e li bassà, li ha ditto, per amor di la Signoria li à lassà ducati 4000 etc., ut in litteris.
     
      Di Hongaria, dil secretario nostro, molte letere, date a Buda, l'ultime sono di 18 octubrio. Zercha Both Andreas, ban di Segna, qual à dà rota al conte Zuanne di Frangipani; et il re à mandà il vescovo di Cinque Chiesie a conzar dite diferentie. Item, altre particularità, e zercha li danari dia aver il re.