Sier Piero Gradenigo, di sier Andrea, fo capetanio di le saline in Cypri.
      Sier Marco Donado, el 40, quondam sier Mathio.
      Sier Hironimo Avogaro, fo podestà a Valle, quondam sier Bortolo.
      Sier Zuam Andrea Cocho, fo 40 zivil, quondam sier Francesco.
      Sier Zorzi Valaresso, fo 40, quondam sier Marco.
      Sier Santo Malipiero, fo camerlengo in Candia, quondam sier Francesco.
      [670] Sier Pollo Paruta, fo 40 zivil, quondam sier Zuane.
      Sier Alvixe de Mezo, quondam sier Francesco.
      Sier Piero Querini, quondam sier Biaxio.
      Sier Marco Antonio Contarini, quondam sier Hironimo, da San Moisè.
      Sier Thomà Memo, di sier Nicolò.
      Sier Piero Gradenigo, di sier Cabriel.
      Sier Donado Moro, quondam sier Bortolo, fo ...
     
      [1508 11 18]A dì 18. Fo consejo di X. Et nota, in questi zorni vene sier Alexandro Bolani, venuto podestà et capetanio di Feltre, et referì in colegio, justa il consueto.
     
      [1508 11 19]A dì 19. Fo gran consejo. Et fo leto una parte, presa nel consejo di X, a dì 15 di l'instante, conzosia che 'l sia stà mandà una letera ai signor capi dil consejo di X, per la qual avisa, esser uno che sa, et aver tal scriptura contra di uno, concernente gran beneficio al stato nostro; perhò si dichiara a tutti, che in termene di tre zorni el vegni ai signor capi, a manifestar il tutto, el qual sarà tenuto di credenza, et meritato secondo la punition sarà fata a quelui dil qual si dice, altramente incora in quella medema pena saria incorsso el principal etc., ut in parte.
     
      [1508 11 20]A dì 20, luni. Da poi disnar a Castello fo fato le exequie al patriarcha Contarini morto, zoè a la sua cassa, justa il consueto, perhò che 'l corpo zà era stà sepulto.