Et per l'hora tarda, non fu balotà il colateral.
     
      [1508 12 05]A di 5. Fo etiam pregadi. Et non fo leto alcuna letera.
     
      Referì sier Andrea Bondimier, venuto capetanio di le galie di Alexandria, et laudato. Disse il suo viazo, et quello à fato in Alexandria; et la crida fece, et fu fata far in Alexandria, con grande honor di la Signoria, che tutti, chi doveva haver de nostri merchadanti, vengi, che serano fati da esso capetanio satisfar avanti el si parti. Item, che le galie erano richissime e carge; e lui feva assa' aqua et non haveva pam in galia. Et lui capetanio convene tuor il boletim di l'armirajo di la licentia, e li costò ducati 80 a uno et 50 a un altro. Item, disse molte cosse, e laudò li patroni e l'avaria posta a la merchadantia, per il star in Candia, per il consejo di 12. Item, disse di officiali; et aricordò molte provision da esser fate a le galie di viazi, qual piaque al pregadi. Et venuto zoso, fo laudato dal principe.
     
      Fu posto, per li savij, condur uno lector in humanità, con salario ducati 120 a l'anno, per lezer a quelli di la canzelaria, e far la examination etc.; e chi si vol scriver, si scrivi in canzelaria et si balloti im pregadi. Fu presa, qual si paga dove si paga i canzelieri.
     
      Fu posto, per i savij, certa regulation di 600 soldati è in Cypro, a Famagosta, che sia fato una cerneda di 300 di quelli, atento è molti paesani, et sia facti di qui 300, soto 3 contestabeli, per colegio, da esser balotadi, uno di lhoro sia capo, ut in parte. Fu presa.
     
      Fu posto, per i savij, la parte di la mojer fo di Bertoldo da Meldola, contestabele nostro, morite a Zara, mandato a Lavrana, è creditora di suo servito, che li sia dato ducati 100, da esser pagati in 5 anni a la camera di Zara, a raxon di ducati 20 a l'anno, ut in parte.