Et volendossi disputar ditte opinion, sier Piero Antonio Morexini, savio ai ordeni, messe de indusiar a un altro consejo, per esser l'hora tarda; e cussì fo indusiato. Et nota è lì governador, posto per il provedador di l'armada, sier Antonio da Pexaro, quondam sier Francesco, era soracomito; et castelam in la rocha, sier Hironimo Michiel, di sier Zuane.
     
      Fo poi balotato il colateral zeneral. E, tolti 8, rimase domino Antonio Cao di Vacha, provisionato di lo excellentissimo consejo di X, el qual ave 81 et 80 di no. Fu soto, di largo, domino Hironimo Sovergnam, qual l'altra fiata non fu balotato. Et il scurtinio sarà notato qui sotto, zoè la nomination fata.
     
     
      Ballotati collateral zeneral.
     
      † Domino Antonio Cao di Vacha, padoam.
      Domino Hironimo Sovergnam, di Friul, nobele nostro.
      Domino Vetor da Martinengo, nobele nostro, brexan.
      Domino Zuam Jacomo de Vil Marcha', vice colateral.
      Domino Cosma di Monte, vice colateral.
      Domino Piero Filippo Muro Novo, vice colateral.
      Domino Zuam Marco d'Arzignam, vice colateral.
     
      [684][1508 12 06]
      A dì 6, fo San Nicolò. La matina fo in colegio, a ringratiar il principe et la Signoria, domino Antonio Cao di Vacha, colateral zeneral, vestito di veludo paonazo. Et è da saper, è fama à fato assa' stochi per spender, et a la fin à obtenuto ditto oficio. À di salario ducati 300, et è provisionato dil consejo di X, ducati ..., a Padoa. Da poi disnar fo gran consejo. Fo leto una parte, presa dil 1495, nel consejo di X, zercha certi ordeni di gran consejo, et maxime, quando si va a capello, non si ritorni in quelli medemi banchi; et fo ditto, tutti advertischa, che dita parte sarà observà.