Fu presa.
     
     
      Sumarij auti da Cremona 1508,
      a dì 17 dezembrio.
     
      Per letere dil secretario da Milan, di 7 dezembrio. Come ha, per letere da Zenoa de 29, el duca de Sibilia, cum certi altri signori, se havevano solevati contra el catholico re. E zonse a Milan, a dì 6, un nontio de' luchesi, el qual se dole che fiorentini, con 1700 cavali et 5000 fanti paesani, habino depredà et brusà certe ville de epsi luchesi, et inferitoli danno per ducati 30 milia; et che volevano andar a campo a Pietrasanta, pregando el loco tenente ad far qualche expediente provixion per la indemnità lhoro, et proibir che fiorentini non ardiscano tentar novità contra luchesi.
     
      Per letere de Framza, date in Bles, a dì primo. Monsignor legato fu acompagnato, da monsignor de Gravilla et monsignor de Pienes, con tutte le zente d'arme de Picardia, fin a li confini, et lì elexe 50 homeni d'arme benissimo im ponto, et con molti soi intrò a dì 23 novembrio in Cambrai. Dove li vene incontra tutto el clero con le croce etc., et acompagnato a la gran chiesia, fu cantato vesporo. Poi sua signoria andò a visitar la duchessa de Savoja, madama Margarita; et haveano principiato a tratar insieme, et speravano concluder pace et apontamento.
     
      Da Bologna. Se ha adviso, che 'l legato era intrà con certe zente d'arme in Imola, et havea fato signor suo fratello, posto castelan e podestà dei suo'.
     
      [693] Per letere di Brexa, di 6. Di la morte di missier Lodovico da Martinengo, zenthilomo nostro, el qual have per moglie una Veniera, poi tolse una vedova con 6000 ducati.