[701] Andò le parte: 17 l'Emo, 54 il Trun, il resto di savij. Et quella fu presa, et fo comandà stretissima credenza.
     
      Fu posto, per li savij, che uno turco, venuto qui con Andrea de Re, qual è ritornato di Constantinopoli, stato presom zà mexi 4, che li sia dato do cavali di stratioti, et provision, ut in parte. Et fu presa.
     
      Stete pregadi suso fino horre 4 di note.
     
      [1508 12 31]A dì 31, domenega. Da matina fo in colegio li presoni venuti da Constantinopoli, con la galia, sopracomito sier Alvise Contarini, quondam sier Piero, la qual li alevoe ..., et veneno vestiti a la grecha, con tulimani, videlicet sier Marco Orio, sier Batista Polani, di Candia, sier Vicenzo Pasqualigo, quondam sier Cosma, sier Vicenzo Zantani, di sier Zuane, sier Pollo Zustignan, quondam sier Piero, quondam sier Dionise, et altri populari, in tutto numero ..., qualli sono stati presoni in la torre di Mar Mazor anni ..., et reschatati tutti per ducati ... Et veneno con tanta pressa e furia, che li veniva driedo per vederli, che era cossa stupenda. Or sier Marco Orio tochò la man al doxe et colegio, et disse alcune parole di le cosse di Constantinopoli e dil signor turco, perhò che partino a dì.., venuti fino ...
     
      Noto. L'orator di Franza, Laschari, in questi zorni fo in colegio, e mostrò letere dil re zercha l'acordo fato, qual debbi notificarlo a la Signoria. Et ditte letere è molto seche.
     
      Da poi disnar fo gran consejo. Et fo publicà una parte, presa nel consejo di X, a dì 29 di questo, che de caetero non si fazi più in questa terra, ni a noze, ni in nisun loco, recitar comedie, tragedie et egloge, sotto pena, a quelli in cha' de chi, di ducati 100, e privation per do anni de oficij et consegij, et quelli li fesseno, ut in parte etc.