E questo mete una bona summa de danari, dico bona.
      Lo christianissimo re si è obligato a questa primavera dar gente a cavallo et a piedi al re di romani, per andar a Roma a la incoronation; et già più se dice, che ananzi passa marzo futuro, lo re vignerà a Milano, et forsi la rezina con lui. Madona Margarita, a nome de suo padre et de soi nepoti, presente lo orator anglo, ha jurato supra Corpus Domini, et similiter el reverendissimo monsignor legato, a nome del christianissimo re; et che tutto quello hanno concluso observarano et farano observar.
      Doman monsignor de Faris et lo signor Alberto da Carpi se parteno per andar in Fiandra, per far confirmar et jurar el re de' romani, et similiter madama Margarita manda doi da lo christianissimo re a confirmar et jurar.
      Monsignor reverendissimo del Finale, mia patron, se retrova a Bles a far le feste, credo presto vignerà in Italia, per andar a Roma, mandato dal christianissimo re.
      Data im Cambrai, a dì ...
     
     
      Sumario di letere dil Caroldo, secretario a Milan, de dezembrio 1508, drizate a sier Zacaria Contarini, el cavalier, capetanio di Cremona.
     
      Per letere de ..., recepute l'altra note, e date in Cambrai in Fiandra, a dì X dil presente, se ha adviso, como in quel zorno, cantata la messa per lo episcopo de Tornai, fu publicata pace fra lo serenissimo imperatore, lo christianissimo re di Franza et lo principe de Castiglia, per mezenità dil re de Ingaltera et soi colegati. In la qual publication sono stà nominati el papa, el re de Aragon, al qual s'è dato termine 4 mexi ad poter intrar in la liga et [705] pace predicta, nominato comune amico de l'una parte et l'altra; et che fin dicti 4 mexi, cadauno de lhor habino a nominare sui confederati, i qualli posino in dicto tempo intrar in dita pace.