Di rectori, di Corfù. In conformità, sier Antonio Morexini et sier Priamo Contarini; et di quelle occorentie.
     
      Di Cypro, di sier Lorenzo Justinian, luogotenente, et sier Piero Baxadona, consier. Nove di Sophì, qual à roto il soldam di Bagade, et fugato fino in Aleppo, roto i fioli di Allidulli. Et à aviso di questo da Tripoli, e manda el capitolo, qual sarà notado qui avanti.
     
      Di sier Beneto Sanudo, capetanio a [712] Famagosta, di 16. Dil suo zonzer lì; et come à trovato quella terra, e il bisogno; e le nove di Sophì etc., e le galie zonte e il cargo.
     
      Di Alexandria, di sier Marin da Molin, consolo nostro, di 6 novembrio. Come à inteso, non è stà preso di mandar le galie; dice è mala opinion, e saria bon mandarle etc. Et che mori dicono, la causa che non è venute le galie, et che si fazino vegnir etc. Item, dil zonzer lì 3 barze francese, carge di panni e ogij. Item, dil zonzer a Bichieri 3 nave rodiane, con li mori presoni, numero ..., et Tangavardin, fo orator dil soldan a rescatarli. Qual conzò lo rescato in ducati 32 milia, et li mandaseno lì, che il patron di la nave aria li danari avanti dismontaseno, et stesse zorni 23. Et zonte, scrisse al Cajaro questo al signor soldam; qual non volse l'acordo, dicendo Tangavardin non havia tanta libertà, solum in X o ver 15 milia ducati; e lui, per non contradir al signor, disse l'havia fato da lui, perchè mori voleano lhoro pagar questi danari. Le letere andono su e zoso, spirò li zorni, et composeno ancora stesse 5 zorni, e dete al patron ducati 250 di presente; sì che si conzarà la cossa.