Da poi disnar fo colegio di la Signoria et savij. Et fo letere di Franza, di 27 et primo, da Bles. Come Roan non era zonto, ma andato a Roan, e saria a la corte per tutto il mexe; e monsignor di Chiamon andato im Amboys, a uno suo loco.
     
      [1509 01 10]A dì 10. Fo consejo di X con zonta, su danari.
     
      [1509 01 11]A dì 11. Fo consejo di X con zonta, fo su danari.
     
      [1509 01 12]A dì 12. La matina sier Vicenzo Valier, venuto capetanio di Vicenza, referì, sì dil capitaneato, qual di lochi di vicentina, succincte, adeo fo assa' laudato.
     
      Da poi disnar, consejo di X con zonta.
     
      [1509 01 13]A dì 13. Da poi disnar fo colegio di la Signoria e savij, e fo spazà uno contestabele a Butistagno, con ... fanti, ... da Zara.
     
      Item, è stà preparà 3 corpi di fuste in l'arsenal, per mandarle in lago di Garda, si 'l bisognerà, zoè fonno disfate im pezi, et si condurano fin su lago e lì si conzerano.
     
      Fo letere di Roma. 0 da conto.
     
      [1509 01 14]A dì 14. Da poi disnar fo gran consejo. Et hessendo scurtinio dentro, uno mato di San Nicolò andò in renga, disse alcune pazie etc. Item, a la scala era sier Zuan Andrea Lion, quondam sier Marin, procurator, qual deva bolletini, per esser tolto zudexe di petizion, è di anni zercha 50, et, vedendo, alcuni refudavano a intrar; lui voleva esser fato.
     
      Da poi consejo fo letere di Franza, da Bles, di 5, in zifra, ut supra. Come il cardinal Roan si aspetava a dì 7; et lo Albanesoto, corier, che partì a dì 30 da sera, et dia esser a Bles in 7 zorni, non era ancora zonto.
     
      Nota. In Rialto in questi zorni fo fato incanto de li arzenti e altre robe fo di sier Zuan Baptista Bonzi, morto ultimo di caxa.