Sier Piero Antonio Morexini, savio ai ordeni, con altri, vuol sia tolta in la Signoria, e fato uno provedador et uno castelan, ut in parte. Li savij dil consejo vol indusiar. Sier Piero Diedo, savio ai ordeni, vol sia electo 5, i qual debbi veder de jure. Or parlò primo sier Piero Antonio Morexini, per la sua opinion, fo longo; et li rispose sier Hironimo Querini, savio a terra ferma. Non andò le parte, perchè non compite; e licentià il pregadi.
     
      [718] In questo zorno, im pescharia a Rialto, fonno apichati 3 ladri, robono uno magazen di formagij, sotto sier Piero Duodo, di là dil Canal, et a uno fo tajà la man e cavà uno ochio. Et uno di questi ladri, per esser bel corpo, li medici lo volseno da far anatomia et l'ebeno, et fo commenzata a San Stefano, a dì ..., la qual durò zorni ...
     
      [1509 01 17]A dì 17, fo Santo Antonio. Da poi disnar fo colegio, di la Signoria e savij, per far uno scrivan a la camera di Rimano, in loco di ... Vasalo, era morto. Fo controversia, si li savij ai ordeni e capi di XL.ta poteano balotar; la Signoria terminò balotaseno, et 0 fo fato.
     
      Vene letere di Roma, di 13, et di Spagna; dirò poi il sumario.
     
      [1509 01 18]A dì 18. La matina li consieri veneno a Rialto, per incantar le galie di Barbaria, et non trovono patroni a niuna di esse galie, e si levono suso.
     
      Da poi disnar fo consejo di X con zonta.
     
      Noto. La Signoria in questo tempo fa vender monte nuovo per li provedadori sora la camera d'imprestidi a ducati 100 el 100, per aitarsi dil dinaro per li bisogni.
     
      [1509 01 19]