A dì 19. Da poi disnar fo consejo di X con zonta.
     
      [1509 01 20]A dì 20, fo San Sabastian. La note grandissimo vento, e neve tutto il zorno.
     
      [1509 01 21]A dì 21. Fo gran consejo. Vene letere di Roma, in 40 hore, di gran importantia. Come il Pixani e Badoer erano stati insieme dal papa, et alia secretiora; et chome il Badoer va tolendo licentia et da li cardinali, e si partiria a dì 22. Item, mandò le bolle dil patriarcha, qual li costa ducati 500 e non più etc., ut in eis.
     
      [1509 01 22]A dì 22. Da poi disnar fo consejo di X con gran zonta, per queste letere venute di Roma, et veneno zoso a hore 5 de note. Et a hore 9 fo expedito letere a Roma di gran importantia. E nota, intisi a dì 19, nel consejo di X, fo fata una zonta nova sopra queste materie presente etc.
     
      Noto. In questi zorni, per la Signoria nostra fo expedito letere in Ingaltera, portate per Zuan Gobo, corier, per saper di quelle occorentie, hessendo de lì li oratori di Bergogna, per le noze, come ho scripto di sopra. El qual corier non portò letera alcuna di marchadanti.
     
      Item, in questa sera, hessendo consejo di X suso, vene letere di Franza, molto desiderate, di 7 fin 15. È di gran importantia, come dirò di soto, portate a posta per il nostro corier Albanesoto; per le qual nostri steteno molto suspesi.
     
      [719][1509 01 23]
      A dì 23. Da poi disnar fo pregadi. Et leto le infrascrite lettere:
     
      Di Spagna, di sier Francesco Corner, orator nostro, date in Sibilia, a dì 15 dezembrio. Come il re si partiva per Vadalajusa. Item, scrive di le galie di Barbaria et altro; 0 da conto.