Rimaseno sier Polo Pixani, el cavalier, 146, sier Alvise da Molin, 134, sier Alvise Venier 114; soto, sier Zorzi Emo, 100, i altri non passò.
     
      Et licentiato il pregadi, restò consejo di X, con zonta et colegio, fin hore 4 di note. È da saper, in questi pregadi importanti li procuratori vieneno sempre, et maxime sier Domenego Morexini, ch'è di anni 92, et sier Polo Barbo, sier Luca Zen e altri.
     
      In questa note gionse sier Carlo Valier, ritornato de Mantoa; e la matina fo ai cai et referì. In conclusion se intese, il marchexe non à voluto aceptar il [738] partito, dicendo quello farà il papa lui farà etc. El qual sier Carlo diceva, era stà a Mantoa per uno suo debitor etc.
     
      Di Roma, fo leto letere in questo pregadi. Come li oratori fonno dil papa a dì 31, et verba. Il papa non vol far liga, ma star universal; sì che di Roma non è 0 di bon. A bocha, Mafio corier disse, si diceva per Roma, a dì 2 si dovea publichar la liga.
     
     
      Sumario di letere di Cremona.
     
      Letera di 29 zener. Chome domino Nicolao de Docea à parlato a uno milanese, dice aver visto letere di Franza, di monsignor de Lavol, a monsignor de La Mota è a Milam, che il re sarà a Milan a mezo febraro, che dovea esser per Pasqua; et monsignor de Anguleme dia acompagnar l'imperador a Roma con 600 lanze et 6000 fanti. El qual ha promesso dar i fioli fo dil signor Lodovico al re, ai qual soa majestà promete darli stato in Franza, de intrada scudi 40 milia a l'anno, et beneficij ecclesiastici.
     
      Letera di 30. Di uno Zuan Martim, vien da Monferà, va a Mantoa, et è mantoano.