El qual juditio, el predito Caroldo pensa sia più presto del signor Zuan Jacomo, che de algum astrologo. El soprascrito Caroldo è dimandato a Milan, se la Signoria à orator in Alemagna, et dubitano assai; per il che pensa, che 'l re di romani non habia ratifichà la pace, perchè se intenderia qualche acto solemne. Se dice, che 'l re prefacto viem versso Ispruch et poi in Italia, et similiter la majestà christianissima; et che 'l Condolmer, orator nostro, è stà licentiato dal re. Item, el signor Antonio Maria Palavexim, qual di Franza è zonto a Milam, se à imbarchato im Po, et va per aqua a castel San Zuane et in quelli suo' lochi.
     
      Letera di 2 fevrer. Come domino Jannes di Campo Fregoso, è col signor conte di Pitiano, è stato lì a Cremona, a veder la terra. Item, è stà principià a zonzer a Parma homeni d'arme francesi.
     
      Letera di 3. Dil ritorno di Milan di sier Vetor Pixani, quondam sier Francesco, dal banco. Dice, a dì 4 el gran maistro partiva da Bles, et a dì 17 partiva il re per Milan; et che milanesi hanno deliberato nel suo consejo pagar al re 8000 fanti in servizio di sua majestà. Si aspeta a Zenoa 6000 vasconi, vengono lì per mar; i qual, il re li manda al papa.
     
      Item, monsignor di la Peliza, et 4 zentilomeni ... vien a Cassam, a fortifichar, hanno fato cride di fanti. Item, essi rectori mandono uno aviso, auto di domino Mateo Cusatio, che hessendo capità de lì a Cremona uno cavalier di Rodi, suo parente, li ha dito che, zuoba 8 dì, fo a Milan, in caxa di missier Zuan Jacomo Triulzi, et poi cena gionse una cavalchata di Franza, con una letera dil re a missier Zuan Jacomo in questo tenor: Voi non haverete per male, che vogliamo far guerra a' venitiani, perchè, havendo nui mandato a conservatione del stato lhoro, et havendolo cresciuto, lhoro non hanno havuto respeto nè a voi nè a noi, come sapeti; unde havemo deliberato trovarsi avanti Pasqua in Italia, et haver con [740] noi 2000 lanze et fanti 20 milia, de li qualli voy ne fareti fare lì in Milano 5000, et altri 5000 venirano de' sguizari, et X milia tra normandi et guasconi, con bona quantetà de artegliarie grosse.