Preso.
     
      Fu posto, per tuti li savij, scriver a sier Agustin da Mulla, capetanio di le galie di Fiandra, habi zorni ... di muda, poi recevute le letere, e si parti e vengi adretura in questa terra. Et fu presa.
     
      Fu posto, per i savij, armar X galie sotil, et do galie bastarde, atento l'armar fa il re di Franza a Zenoa di 4 nave, et im Provenza galie. Item, si elezi per gran consejo X sopracomiti. Sier Hironimo Querini, savio a terra ferma, vol armar 4 nave, qual parerà al colegio; sier Piero Antonio Morexini, savio ai ordeni, vol certa sua opinion di armar: et ave 4 balote. Fo cazà quelli havea parte in nave. Fo disputation: parlò sier Vetor Michiel, vol le nave; li rispose sier Alvise Pixani, savio a terra ferma. Poi sier Hironimo Querini; li rispose sier Anzolo Trivixan, consier. Andò le 3 parte: 61 dil Querini, e più di 130 di savij; e questa fu presa.
     
      Fo chiamato 30 patricij di pregadi, a mandar contra, a Liza Fusina, dil conte di Pitiano, qual vien mercore, a dì 14, alozà a San Stefano in cha' Barbaro, dove stava l'orator di Franza, partito. El principe anderà poi, con li piati, fino a San Biaxio.
     
      Di Traù, di sier Alexandro Viaro, conte. Zercha zerta incursion di alcuni turchi, e menato via certi animali etc.
     
      Et licentiato il pregadi, restò consejo di X con la zonta, fino hore 4 di note.
     
      [1509 02 13]A dì 13. Si partì sier Marco Loredan, va provedador dil castel di Cremona; menò con si Bernardin Brendola, fo cavalier dil doxe, et zercha ... homeni maritimi, et ...
     
      Da poi disnar la Signoria dete audientia, e li savij consultono.