El qual conte è gajardo, va a piedi, vestito d'oro etc.
     
      Da poi la caza, si reduse il principe, con la Signoria, in colegio, et alditeno, con li capi di X, pre' Lucha di Renaldi, orator cesareo, era a Roma, per il qual fo mandato per il consejo di X, acciò andasse dal suo re a tratar acordo; et steteno in colegio molto tardi. El qual pre' Lucha eri, horre 22, gionse qui, alozato a la Trinitae, in caxa di uno citadim, nominato ..., per esser più secreto. Za Zuan Piero Stella è in camino.
     
      [752] In questi dì gionseno alcuni fanti, 200, dil signor Piero dil Monte, fati far in Romagna; et cussì fonno imbarchati et mandati versso Trieste, dove è il predito Piero dil Monte.
     
      Item, vene di Roma in questa note Zuan Cotta, homo et secretario dil signor Bortolo, stato lì per acordar il signor Prospero Colona e altri; è cossa pertinente.
     
      Item, di li danari, persi sora Chioza, si ave esser stà trovà in aqua uno sacheto vuodo con i sani inbachi (sic) etc. di quelli, adeo si tien siano stà tolti a man. Et molti è di opinion di retenir quel Andrea, fante di camerlengi; quel sarà scriverò. Ben è da saper, zà è stà mandà altri ducati X milia a Faenza, per far li fanti, a quelli Naldi di Val di Lamom etc.
     
      [1509 02 16]A dì 16. Poi disnar fo consejo di X con la zonta, fino horre 41/2 di note. Fo dito esser stà spazà pre' Lucha, el qual in questa notte partì; altri dice fo asolto domino Sonzim Benzon da Crema, è confinato a Padoa, acciò si operi in questa (im)presa, tamen non fu vero. Ben fo vero, che fo expedito dito pre' Lucha e datoli raynes 300; e la matina si partì, per tratar col re di romani acordo con la Signoria.