Item, che a Pavia sono 20 galioni in l'arsenal, vechij e mal conditionadi. Item, lì a Cremona è stà terminà far 100 molini da man; le vituarie tutte è stà portà in la terra. Il conte Bernardin e il conte Alvise Avogaro è lì, e le sue zente alozate in el teritorio; tutti li castelli voleno artilarie. El marchese di Mantoa ha messo 50 provisionati et 50 balestrieri in Viadana; et è stà fornito alcuni soi castelli di qua di Oglio. Item, de' 6 deputati per quella comunità a presso i rectori, a proveder a le cosse presente, sono questi:
     
      Domino Francesco Benzom.
      Domino Otolim Cauzo.
      Domino Zuan Maria di Fodri.
      Domino Alberto da Doera.
      Domino Nicolò da Doera.
      Domino Paulo di Cambiam.
     
     
      Di Franza, di l'orator nostro Condolmer, date a Bles, più letere, perhò che prima veneno quelle di 7, portate per Zuan Gobo; poi 3 zorni gionse altre per via di Milan più vechie, qual erano stà retenute. Or in ditte letere, numero ..., di 27, 28 zener, 2, 3, 4, 7, 8 fevrer, scrive molte cosse. Et non pretermeterò di scriver l'ultima, di 8, scrita al secretario a Milan, di la licentia; et il presente sumario è questo, qui sotto scripto.
     
      Vi notificho, qualiter a dì 5 de l'instante la regia majestà summo mane se partì di qui, aviandose versso Burges. Et mane eodem mi mandò a casa monsignor vescovo de Lodi, con el thesorier de la [755] Tranciera, per doi effecti. El primo, per darmi licentia honestamente da la sua corte, sub forma infrascripta; zoè che sua majestà andava versso Burges, fora de strada, per stranei et angusti alozamenti, ex quo mi faceva intender, che io me aviasse a Liom per la dreta, perchè io haveria mazor commodità che seguitar la corte; et per altra via son certifichato, che in Lion me sarà mandata la diffinitiva licentia.