[1509 02 18]A dì 18, domenega di carlevar. La matina fo letere di Roma, di oratori, di 14. Come a di 12 il papa ritornò di Hostia, con 5 cardinali, San Piero in Vincula, Pavia, Urbin, Corner et Ragona, et li oratori di Bergogna etc. Et fo lete con li capi di X, et commandà gran credenza per la terra; si dice sono bone letere. Il sumario lo dirò poi.
     
      In questo zorno fu fato in fontego novo di todeschi certa festa solita, dil porcho, a mazar da li orbi; et fo fato certa custione. Item, fato festa da la raina di Cypri, per le noze di una sua neza, fia di sier Zuan Venier, in uno conte ... Brandolin, di Val de Marin. Etiam in Canarejo, per le noze dil fio di Fazio Tomasini in una Rabia, et a San Simion grando, e altrove, fato caze; sì che la terra era su queste caze.
     
      Da poi disnar fo colegio et expedito provisionati, zoè contestabeli, et fato molte provisione, ita che si arà assa' numero di fanti forestieri maxime.
     
      [1509 02 19]A dì 19. Da poi disnar fo consejo di X con la zonta. La qual vene zoso a hore 23, et restò il [757] consejo simplice, fin horre do di note. Tanto spesso è consejo di X, e tramano assa' cosse, che a la fin si saperà.
     
      [1509 02 20]A dì 20, marti di carlevar. Il colegio da matina, et da poi disnar, ateseno a expedir contestabeli; et altri nostri mandono a caxa, con hordine preparaseno li homeni e fanti, perchè se manderia li danari a darli, et terminato il numero di dar a tutti i contestabeli vechij. Item, altri novi forestieri; sì che fin qui hano spazato, et arà fanti forestieri 18 milia et nostri X milia etc.