Item, a 12 di questo se dovea far la mostra de le infrascripte fantarie: normande 2000, picardi 4000, qualli dieno venir per terra, et potevano venir in 40 o in 50 zorni in Italia; a dì 15, la mostra di guasconi 8000, et deno venir per aqua, et inbarcharsi a Marsilia, pono venir in un mexe o tre setimane; artelaria nova se deno condur, et se torà in logi propinqui, videlicet Liom etc., colovrine grosse 8, canoni 12, falconeti 16, con ballote, polvere etc. Crede debano esser per Pasqua.
     
      In Italia dice esser homeni d'arme 1150. La majestà del re compise la summa di 2000 homeni d'arme, 4000 arzieri, computando li 200 zentilomeni et arzieri 400 de le guardia sua.
     
      Doe compagnie nove sono pasate, zoè el baron de Bernia, et l'altra del capetanio Castelardo. Li svizeri sono sotosora, perchè la majestà dil re non ne vole se non 6000, et li diti voleno ussir in 30 milia, per esserli stà cussì promesso; et, se non li è ateso, servirano la Signoria de Veniexia.
     
      El papa, avea promesso torne X milia de' guizari, al presente non ne vol algun.
     
      [767] El serenissimo re de' romani ancor lui sta cussì, perchè dicono, li todeschi non voleno sguizari de compagnia in guerra. Le terre franche sono salde, che non voleno romper la liga fitta con la Signoria de Veniexia; et cussì per le predite discordie sono sotosopra.
     
      Monsignor gran maistro debbe venir el dì de carneval a la Fossa nostra, con li capetanij de le compagnie vechie.
     
      Lo illustre marchese sta dubio per queste cose: el vede che le vano tardi, vede gajarde provisione che fa la illustrissima Signoria, sia in titubanza se 'l se trova qualche occasion di aceptar li partiti, che li dà la Signoria.