Porro ex sententia divina, cujus judicia abyssus multa, qui frangit omne superbum, ne de caetero praedictis hostibus occasio malignandi, vel facultas rebellandi praestetur, fossata complanamus, muros subvertimus, turres omnes destruimus, et totam civitatem in ruinam et desolationem ponimus: sicque ad promovenda alia negotia, et ad plenariam Imperii reformationem exercitum nostrum, et victrices aquilas feliciter convertemus.
      DOCUMENTO I
      (Sir Raul. De rebus gestis Friderici I. S. R. I. vol. VI. pag. 1188.)
      Praedictus vero Petrus de Cunin innumerabiles modos oppressionis invenit, et miris modis pecuniam extorquere coepit. Nam obsides permutari, pecuniam a debitore exigi non in pecunia data permittebat; privatim a rusticis, et a civibus pecuniam extorquebat. Morienti sine filio succedebat, et ea aestate milium et vinum a militibus et rusticis pro arbitrio suo accepit; et multam pecuniam a rusticis occasione porcorum circa Sanctum Martinum extorsit. Item occasione tributi a Palatino Modoetiae agnellorum in Pascha infinitam pecuniam exegit. Sequenti vero aestate jussit omnibus Mediolanensibus ex constitutione Imperatoris, qui erant de jurisdictione Leodiensis Episcopi, idest a Busti Carulfi, et a Legnano, et Seviso, infra duas partes tertii et ficti et quartam partem fructuum promovere quaestionem castanearum et nucum, et foeni tertiam partem. Henricus vero Suevus, qui ex praecepto Imperatoris in monte Ghezonis morabatur, omnes fructus terrarum Mediolanensium, quas habebant in Episcopatu Laudense, colligebat.