Et si aliqua Civitas, vel ulla persona adhaeserit parti Imperatoris F. ita quod sit contra hanc nostram Societatem, ego dabo operam bona fide ad eum expellendum de suo habitaculo, et res ejus devastandas. Nec ultra ero in consilio, ut a nobis sit receptus, nisi communi consilio omnium Rectorum Civitatum vel majoris partis. Et si erit de mea Civitate, bona fide operam dabo, ut domus ejus, quam haberit in Civitate, destruatur, et de Civitate expellatur. Et legationes, vel literas Imperatoris F. scienter non recipiam fraude. Et si aliquo modo ad me venerint pro damno Societatis bona fide Rectoribus ostendam, vel ostendere faciam. Et nullam concordiam faciam cum Imperatore F. aut filio ejus vivente F. Imperatore, nisi communi consilio omnium Consulum omnium Civitatum Societatis, vel majoris partis Consulum, nisi forte aliqua Civitas pacem vetare voluerit. Nec ero in consilio, ut mea Civitas faciat sacramentum contra hanc concordiam; et si facta sit, vel facta fuerit, bona fide operam dabo ut frangatur; et ego bona fide operam dabo, adjuvare generaliter sine fraude homines meae Civitatis et mei Districtus, quos sine fraude videbitur mihi expedire. Vel faciam jurare Consules meae Civitatis, quod facient jurare homines suae Civitatis et Suburbiorum, ei Civitati conjunctorum, hoc sacramentum infra duos menses, postquam intrabit in Consulatu, a septuaginta annis infra. Et a quindecim annis supra sine fraude. Nec ero guida, nec spia ad damnum nostrae Civitatis ad utilitatem hostium; et hoc attendam bona fide.