Item, mandoe do copie di lettere, una del provedador di Nepanto, di do, et una di sier Francesco Zigogna provedador, di 4, et à fatto la descrition, è in Nepanto persone 3500, zoè homeni da fati. Item, aricorda sia mandà biscoti.
     
      Da Nepanto, di sier Zuam Moro, rector et provedador al capitano zeneral, di do avosto. Come ha nova il campo esser parte a Fersela zornate tre lontano da Nepanto, et il bilarbei et il Signor è a Salonichii. Item, a Stines era zonti assai buffali. Item, Marco Novara contestabele era lì, voria danari, perhò mandava al zeneral, Alvixe Zordam citadim de lì, con uno brigantin.
     
      Da Corom, di sier Francesco Zigogna provedador di la Morea, di 4 al capitano Zeneral. Come a dì 28 era lì cavalchato con li stratioti quali sono 200, et li dava l'orzo, fa le guarde etc. Item, l'armata turchescha è in Portolongo, zoè li picoli legni et le nave e galeaze più in largo. Item, havia ordinà a Modon al bisogno i stratioti vengi, et havia pratichà in li lochi turcheschi et al Brazo di Mayna; et che turchi erano pochi de lì intorno, pur hanno conduto biave in le forteze, e cazà fuora tutti i cristiani.
     
      Da Modom, dil ditto provedador a la Signoria nostra, di 5. Come era lì amalato, havia posto hordine col rezimento a 100 stratioti, a quelli dava la biava, et 10 a la volta fevano la guarda. Item, à fato far una crida pasando l'armada turchescha de lì via niun non vadi verso la marina o su le mure, ma armati vengino su la piaza. Item, persuase l'ambasador de' mori non lassi scender mori a le marine, et à provisto al castello di Moli, et à mandato Domenego Barbiano contestabele con fanti 10 al castel di Quiper et uno citadin de lì al Zonchio per custodia; et à scritto al zeneral che movendosi l'armada fazi segno di fuogo.