Da Lepanto, di sier Zuam Moro rector et provedador di ... Come a Negroponte si fortifichava; et dubitavano per la nostra Signoria armata; et altre zanze, nulla di conto, nì di conclusion.
     
      Da Napoli di Romania, dil capitano zeneral di mar, di 7 et 8. Come, venendo da Modon lì, scontrò la galia soracomito sier Marco Grioni mandata per il provedador Guoro qual è in Andres: avisa il capitano zeneral di nove ha da Syo: come il Turcho vien a danni di la Signoria nostra, et vien a Napoli: per tanto era partito per andar di longo a Caomalio, et terminò ritornar a Napoli con 18 galie, dove à dismontà, et visto la terra et forteze, fato provision, poi si dovea partir et andar verso Andres a trovar el ditto provedador, et aspectava il resto di le galie, et di l'armata acciò fusse grosso; et havia mandato [858] sier Zuam Francesco Baxadona soracomito in Candia per il resto di quelle galie, et li havia dato ducati 4000 con hordine debi armar quel rezimento quante nave sono de lì, et se ditti danari non bastava dovesse trazer in suo nome danari, pagandoli in questa terra. Item, debi far arzieri, et mandarli in armada. Item, scrive dil zonzer di la galia di Trani, et la galia istriana; sta con buon cuor.
     
      Da Ragusi, di Nicolò Gondola, di 17. Avisa zanze dil Turcho; conclude haver nova di la morte dil Turcho, et non fu vero.
     
      Da Dulzigno, di sier Piero Nadal conte et capitano. Come era nova in quelle bande che turchi veniva a' danni di la Signoria nostra.
     
      Da Zara, di rectori, di 24 et 25. Come turchi erano corsi su quel di Nona, et fato pocho danno per esser redute le anime et animali su l'isola; et che essi rectori mandoe a l'Urana 50 valenti homeni, dubitano turchi non vadi a depredar su li borgi di l'Urana.